UEFA Çempionlar Liqasında qrup mərhələsinə yekun vurulub. Pley-fa lider kimi çıxan çempion "Bavariya" A qrupunda sonuncu oyununu da qələbəylə başa vurub. Eyni qrupda Marid "Atletiko"su da qalib gələrək növbəti mərhələyə adlayıb. Ən gərgin mübarizənin qeydə alındığı B qrupunda isə "Real" etimadı doğrultsa da, "İnter"in nəticəsi hamını təəccübləndirib.
UEFA Çempionlar Liqasında qrup mərhələsinə yekun vurulub. Pley-ofa vəsiqə qazandığı əvvəlcədən bilinən "Bavariya" A qrupunda sonuncu oyununu keçirib. Münhen futbolçuları doğma meydanda Moskva "Lokomotiv"ini qəbul ediblər. Meydan sahibləri 2-ci hissədə vurduqları qollar sayəsində qalib gəliblər. 63-cü dəqiqədə Niklas Züle hesabı açıb. Vaxtın yekunlaşmasına 10 dəqiqə qalmış isə Erik Şupo Motinq mübarizəyə nöqtə qoyub: "Bavariya" - "Lokomotiv" 2:0
A qrupunda pley-ofa çıxan 2-ci komanda "Zaltsburq" - "Atletiko" oyununda müəyyənləşib. Bu matçda da eyni hesab qeydə alınıb. Madrid klubu sensasiyaya imkan verməyib. Dieqo Simeonenin komandası 39-cu dəqiqə istəyinə nail olub. Mario Hermoso qonaqları irəli keçirib. Digər qol isə sona yaxın vurulub. Yannik Karraskonun zərbəsi dəqiq alınıb. A qrupunda "Bavariya" 16 xalla lider kimi pley-ofa çıxıb. "Atletiko" 9 xalla 2-ci yeri tutaraq növbəti mərhələyə adlayıb. 4 xalla 3-cü olan "Zaltsburq" mübarizəni UEFA Avropa Liqasının pley-ofunda davam etdirəcək. Qrup yarışını 3 xalla sonuncu yerdə tamamlayan "Lokomotiv" isə avrokuboklarla vidalaşıb.
Gərgin mübarizənin qeydə alındığı B qrupunda isə "Real" sonuncu qarşılaşmada qələbə qazanaraq pley-ofa vəsiqə əldə edib. "Kral klubu" Madriddə "Borussiya Mönhenqladbax”dan üstün olub. Paytaxt futbolçularının heyətində 527-ci oyuna çıxaraq Roberto Karlosun nəticəsini təkrarlayan Kərim Benzema həm də görüşün qəhrəmanına çevrilib. Məhz fransalı hücumçunun vurduğu qollar "Real"a qələbə qazandırıb. O, 9 və 32-ci dəqiqədə başla fərqlənib. Beləcə Zinəddin Zidanın komandası "Borussiya Mönhenqladbax”ı 2:0 hesabilə məğlub edib. Almaniya futbolçularının uğursuzluğuna baxmayaraq digər matçdakı nəticə onların növbəti mərhələyə adlamasına şərait yaradıb.
Qələbə qazanmaq məcburiyyətində olan "İnter" öz meydanında "Şaxtyor"un müqavimətini qıra bilməyib. "Neradzurri" futbol həvəskarlarını təəccübləndirərək rəqibilə qolsuz heç-heçə edib. Bununla B qrupunda "Real" 10 xalla lider kimi, "Borussiya" Mönhenqladbax isə 8 xalla 2-ci olaraq 1\8 finalda çıxış etmək hüququ qazanıb. "Şaxtyor" eyni miqdarda xal toplasa da, şəxsi görüşlərdə rəqibindən geri qaldığına görə 3-cü yeri tutub. Donetsk klubu UEFA Avropa Liqasında çıxış edəcək.